Tips&tricks

We mi mini erinnerig nid tüüscht gits i jedem chlyne kaff am Stuart Highway e campingplatz. D priise i de grössere ortschafte hei uf üsere reis so vo 3-7A$ pro pärson variiert (das isch übrigens no vor dr yfüehrig vor mehrwärtschtür gsy). Türer –mit 11A$ pro nase– sy Yulara u Kings Canyon Frontier Lodge gsy, auerdings wird dr priis mit jedere wytere übernachtig chlyner. Meischtens hei mer aber eifach chli näbe dr schtrass zäutlet u hei i unbesidlete gebiet keni problem gha. I de dichtbesidlete gebiet (südlich vo Port Augusta) isch es hingäge nid immer eifach gsy, e guete platz zum penne oder zum ässe z finge

Am beschte brucht me e BÄNZINchocher. Bänzin isch würklich fasch überau erhäutlech u biuig. I ha mi zwar nid bsungers gachtet, aber i gloube gascartouchene hani nume einisch gseh; u zwar im touristische Yulara

Dr bänzinchocher het aber o e haagge: uf em inlandflug hei mer d brönnschtofffläsche nid chönne transportiere, wüu si no nach bänzin het gschmöckt. Mir heis aber o nid mit ere nid auzu versierte aagschteute z tüe gha. I gloube, mit dr richtige pärson am schauter u chli rhetorik sötti ds problem lösbar sy

Banau, aber gwöhnigsbedürftig: Z Ouschtralie herrscht linggsverchehr (d Ängländer löh lo grüesse). Do hei mir feschtlandöiropäer doch mau chli abwächslig

Obwou Ouschtralie es induschtrieland isch, fingt me zwüsche Darwin u Port Augusta nume sehr weni veloläde. Die fougende schtedt uf däre schtrecki hei e velolade gha: Darwin, Tennant Creek (rächt bescheidnigs agebot), Alice Springs 2x (die kenne Magura nid), Port Augusta. Es isch auso wichtig, dass dir ersatzmateriau derby heit. Mir hei unger angerem fougendes derby gha: ersatzpneu (we dr e Schwalbe Marathon bruuchet und uf teerete schtrasse blibet, sött ei resärvepneu für zwöi velo länge, bi je 5000-6000km), ersatzschlüüch, ersatzschpeiche (bim hingerredli hei die linggi u die rächti syte meischtens verschideni lengine!), schautkabu, brämschlötz, reparaturset für d Magura fäugebräms (bi konvenzionelle brämse es brämskabu mitnäh). Was mer nid derby hei gha, aber bruucht hätte, isch es resärveglüehbirli für e schynwärfer

Öppe d häufti vo üsere gfahrnige schtrecki hei mer mit schtarchem gägewind z kämpfe gha. Dr räschte teilt sech i sytewind, windschtiui u ab und zue es bizzeli rüggewind uf. D houptwindrichtig isch süd-wescht gsy. Es isch auso eventuell bequemer, dr Stuart Highway i die angeri richtig z fahre. Vilech zieht dr nech o mau es paar infos zum ouschtralische klima, wind u wätter yne

Mines erachtens isch e rückschpiegu pflicht! Die ausyts gfürchtete roadtrains sy nämlech nume no haub so wiud, we me se rächtzytig gseht cho. Faus si grad uf öierer höchi mit emne angere fahrzüg chrüze, lohnt sech e chlyne abschtächer i schtrassegrabe, wo übrigens gar ke grabe isch, sondern e (meischtens) gnue breite chiesschtreife

Es isch erloubt, uf eigeti gfahr dr panneschtreife vo freeways, auso vo outobahne aus veloschtreiffe z missbruche. We aber mau es schiud das sött verbiete, isch es sehr ratsam, sech dra z haute – schüsch cha s nämlech ächt gfährlech wärde!!!

Südlich vo Port Augusta nimmt d verchehrsdichti dramatisch zue. Grad we me us dr wüeschti zrügg i d zivilisazion chunnt, cha eim das ganz schön z schaffe mache. Do lohnt sechs sicher, d houptverchehrsachse, dr highway 1 z umfahre. Das schont d närve vo öich u öiem schutzängu

Obwou mir uf teerete schtrasse sy gfahre, hei mer natürlech o es paar meter uf unbefeschtigte wäge müesse probiere. Do hei mer öppis begriffe: üsi ligevelos sy für das nid geignet. Dr Aldi het z viu gwicht uf em vorderrad gha, ig z weni

Ds wasser a üsere schtrecki isch prinzipieu ziemli gruusig im gschmack gsy, aber ämu trinkbar. Mir hei üsi entkeimigstablettene nume säute brucht u hei überhoupt keni beschwärde gha

Uf em wäg dür die dünnbesidlete gebiet hets i unregumässige abschtänd wassertanks, wo me d wasservorrät cha ernöiere. Die tanks sy im Handy Atlas vo Hema yzeichnet, aber leider sy die informazione nid immer uf em nöischte schtand. I ha während üsere reis d date aktualisiert; das isch aber o scho es wiili här... Detaillierti infos het dr Urs Arnold uf syre homepage zämegschteut

We gnue wasser ume isch, cha me d bidons chüele, indäm me e füechte socke (zum bischpiu die rote machins, wo s bi Singapore Airlines uf em flug git – besser wär aber öppis us boumwule) drüber schtüupt. Ds wasser vom socke verdunschtet u entzieht dr fläsche wermi -> me het agnähm gchüeuti getränk

Kakadu Nationalpark. Leider chani zu däm keni pärsöndliche erfahrige wyter gä. Dä bekannt nazionaupark söu aber sehr schön sy, genau so wie dr noch glägnig u viu weniger bekannt Litchfield Nationalpark

Katherine Gorges. E gmüetlechi schlucht, wo me o pär kanu cha erkunde. Usserdäm hets im Nitmiluk Nationalpark 12 wyteri schluchte

Mataranka thermalqueuene. Dass mer die glägeheit nid hei gnützt, wurmt mi no hüt. D thermauqueuene erfröie sech ere grosse bekanntheit

Newcastle Waters. Scho wider e verpassti attraktion! Mir hei zwar bi dr abzweigig zur ruineschtadt übernachtet, aber zu däm zytpunkt hei mer no nid gwüsst, dass mer öppis verpasse

Devils Marbles. Ändlech ume öppis, wo mer hei gseh. Chugeligi gschteiformazione, wo touristisch no nid usgschlachtet wärde

Henbury Meteorite Conservation Reserve. Leider hei mer dr meteoritekrater nid chönne go aaluege – d zuefahrtsschtrass isch wäge schäde gschperrt gsy

Mount Conner. Dr Mount Conner isch e hübsche plateaubärg, wo i dr ungergehende sunne vo wytem sehr ähndlech usgseht wie dr Uluru / Ayers Rock. Vom roadhouse in Curtin Springs (lueg wyter unger) cha me toure zum bärg ungernäh

Uluru. Der berüehmt monolith. Touristisch völlig usgschlachtet. U glych isch er cheibe schön zum aaluege. Was hets jetz scho ume gheisse uf däm wärbeplakat für helikopterrundflüg: "You don't even leave a footprint". Vorschlag: Pär velo u z fuess umrunde! Me het meh zyt für d schönheit z gniesse u närvt nid angeri lüt mit em lärm vom helioktober

Kata Tjuta. Weniger berüehmt aus dr Uluru, aber nid weniger aamuetig. Tip: Ja nid mit dr tour churz vor sunneungergang hifahre, schüsch zerrt me nech nach churzer zyt i ds büssli zrügg u verschleppt nech när zum Uluru (zuegäh, ganz eso schlimm isch es scho nid gsy, aber es geit chlei i die richtig)

Watarrka. Chli absyts vor schtrecki, aber dr umwäg lohnt sech! Eifach schön. Punkt.

Dingo Fence / Dog Fence. Dr längscht zuun vor wäut

Coober Pedy. Es ruuchs schtedtli ire ruuche umgäbig. Ungerirdischi hüslechkeite und e rieseuswau a opalstores lade zu re besichtigung y

Botanische garte vo Port Augusta. Dä erwähni eigentlech nume, wüu er üs het zeigt, was mer vorhär e monet lang tagtäglech während öppe acht schtung hei gseh. Aber für lüt, wo vom süde i norde fahre isch er sicher intressanter, wüu si chöi gseh, was se die nächschte 2000km oder so erwartet

Great Ocean Road. D Great Ocean Road isch es opfer vo üsere chli knapp bemässene zyt worde. Abgseh dervo, dass es dört sehr viu verchehr söu ha, hei mer nume guets dervo ghört

Daly Waters. En urchige pub, öppe 2km vom Stuart HWY ewäg. D wäng sy mit visitechärtli u chläber us dr ganze wäut tapeziert. Usserdäm befindet sech dört ir nöchi dr sagehaft Stuart Tree, reschpektiv das, wo dervo übrig blibt, hehe

Barrow Creek. Sehr schtimmigsvous roadhouse. Dasmou mit gäut us auer wäut a de wäng

Casa Nostra (z Alice Springs). Obwou das waschächte restaurant eigentlech nid i d rubrik "sehenswärti roadhouses" ghört, mues es eifach glych irgendwo erwähnt wärde. Gedigeni atmosphäre u guets ässe vo dr mamma

Mount Ebenezer. Das roadhouse ghört are gmeinschaft vo Yolngu u füehrt e galerie mit kunschtwärch vo de Aborigines

Curtin Springs. Hie hets eifach gfägt. Dr "Original Curtin Springs Bullshit" a dr wang, der choch, wo am abe no bacon & egg het zuebereitet u dr barkeeper, wo üs mit syne dänkschportufgabe het uf trab ghaute. Usserdäm cha me hie gratis zäutle (dr bode entschpricht haut eifach öppe 100%igem wüeschtebode) u für 1A$ dusche

Nid vergässe: wes bi üs langsam heiss wird, geits uf dr südhaubchugle gäge winter zue. Im norde vo Ouschtralie isch es zwar no schön war, aber d tage wärde haut glych chürzer. Usserdäm chas im landesinnere de scho ziemli chaut wärde

D landcharte würdi ersch vor ort chouffe. E grossi fautcharte mit em ganze kontinänt druffe isch unbruchbar, wüu si eifach zweni präzis isch. Mir hei e "Handy Atlas" vo Hema gha. Dä isch im grosse u ganze sehr bruchbar gsy. Es söu aber o gueti charte vo de ouschtralische outo-vereine gäh

Während em flugzügtransport, reschpektiv em be-, um- und entlade wärde d velos hüüffig nid grad mit siidehäntsche aaglängt. Es wird viumous empfohle, d velos i auti velocartons z verpacke. Mir hei druf verzichtet u hei bim hiflug nume exponierti teili abgschrubt u d velos i veloseck us plastic gschteckt. Resultat: D leitig vo mire vordere Magura isch quetscht gsy, d bräms het aber glych funkzioniert wie vorhär. Bim heiflug bini z fuu gsy zum öppis abzschrube u siehe da: Mis velo isch totau unversehrt ir Schwyz aacho. Glück gha!

Wenn dir nech lengeri zyt z Ouschtralie ufhautet, lohnt sechs, es bankkonto ufztue. Me cha praktisch überau mit em bankchärtli zahle. Wär sech lieber uf sini kreditcharte wott verlah, isch ou nid schlächt bedient; mit ihre chame o i de auermeischte läde zahle

Thema gfährlechi tier: Z Ouschtralie hets ke löie oder bäre etc. Die einzige grössere söigetier, wo meh läschtig aus gfährlech chöi wärde, sy d dingos (vor auem die uf de campingplätz, wüu si sech a d mönsche hei gwöhnt u drum nümme angscht vo ne hei). Auerdings sött me sech i de sümpf vom norde vo de krokodiu in acht näh. Usserdäm verfüegt Ouschtralie über ne breiti palette vo giftschlangene. Nid würklech gfährlech, aber sehr zaurych u hönne närvig sy flöige, mügge u mängisch o ameisi

Äbefaus zum thema tier ghört dr fougend tip: schüttlet öji schueh vor em aalege guet us, es chönnte tier (schlangene!) drin sy. Usem glyche grund sött me nie dr ryssverschluss vom zäut offe lo! Schlange schetze d wermi u chönnte sech grad am abe i öie schlafsack verschlüüffe. Drum ou d penntüte am beschte ersch uspacke, we si brucht wird

Z Ouschtralie gits keini 4.5V flachbatterie. Drum hani mini pfunzle nid chönne bruche. Für mini nächschti grösseri reis wirdeni äuä e LED-schtirnlampe chouffe. Gwüssi lüt, schwöre sogar zum velofahre druf 

D dokumänt (pass, kreditcharte) hei mer imne porte-monnaie ufbewahrt, wo me ume haus cha hänke. I ha mi zwar nie würklech dra gwöhnt, aber dört sy d sache dänk am sicherschte ufbewahrt (aber nume we me das machin o würklech ume haus treit!). Usserdäm het dr reisepartner für e fau vom ne verluscht jewyle e kopie vo wichtige dokumänt u ou vom veloschlüssu (und pitlock) gha

E tolli erfahrig isch für mi ds füehre vomene tagebuech gsy. Zuegäh, nach emne aaschträngende oder fruschtrierende tag schläckt me sech nid grad d finger derna, no öppis z schribe. Aber wuchene, mönet oder jahre schpeter lacht me übere leidischt tag am lütischte u fröit sech vo nöiem überne glungnige reisetag

Dr Aldi het sini fötteli grad in Ouschtralie lo entwickle (wüu s biuiger isch) u isch ziemli enttüüscht gsy. D farbe sy viu z intensiv (na ja, das gseht nid emau so schlächt us; mini meinig) u hüüffig sy d ränder grad echli sehr grosszügig abgschnitte gsy. Aber das mues jo nid bi jedem ouschtralische photogschäft der fau sy

Last but not least: