Reisebricht (churzfassig)

D Wüeschti chunnt

Mit dr zyt sy die ydrückliche termitehügle immer chlyner u säutener worde. Ou d böim vo dr savanne sy nümm so hochschtämmig gsy. Wo mer e typ in Renner Springs hei gfragt, wenn de ändlech d wüeschti chunnt, het er gseit "Dir syt drinn! Hie foot d wüeschti a". Tatsächlech markiert dä chly ort (nach ryfflecher überlegig het üse gschprächspartner erklärt, das dörfli heigi euf ywohner) dr meh oder weniger offizieu aafang vor (haub-)wüeschti. I dr foug isch d vegetazion no nidriger worde; büsch und greser hei gly mau dr ton aagäh u mir hei o wyter gseh, wüu jo keni böim meh d sicht hei ghemmt. Wüu mer wiud hei campiert, hei mer üs jeden abe vo nöiem müesse e dornefreie platz zwägmache. Das isch im fau eifacher gseit aus gmacht, we dr ganz bode vo dornegschtrüpp bedeckt isch!

D "tüüfusmurmle"

Öppe 100km südlech vo Tennant Creek befinde sech d Devils Marbles. Viu chani derzue eigentlech gar nid säge; si lige eifach syt jahrtuusige da. Bsungers gfaue het üs abgseh vo de kuriose forme, wo me aatrifft ou d tatsach, dass me sech frei um und uf de riseklunker cha bewege. Si sy touristisch no nid usgschlachtet, obwou sy nume e haube kilometer vom Stuart HWY ewäg sy. Mir hei üs rächt viu zyt gno u hei die grosse märmeli eifach uf üs lo würke. 

Alice Springs – im härz vom kontinänt

Fasch chönnt me meine, dr wind wöu um jede priis verhindere, dass mer uf Alice Springs chöme. Är het so schtarch blaset, dass er ou am Aldi a chraft u närve het afo zehre. Gschafft hei mers aber glych (ätschbätsch!). I dr schtadt hei mer zwöi wouverdienti ruhetäg verbracht, wo jede individueu het gnützt. I ha mer es paar "zivilisazionstouglechi" hose gchouft. Natürlech isch o dusche ufem programm gschtange. Duschet, chleider gwächslet u gwäsche isch i dr regu denn worde, we mer e ruhetag ire schtadt hei ygleit und ufemne campingplatz hei übernachtet (das isch öppe so au 5-6 täg vorcho).

Im "Casa Nostra", emne tolle italiänische restaurant hei mer znacht gässe, bevor mer wyter sy. Das isch o es bsungrigs erläbnis gsy. Wüu mer im dunkle sy gfahre u mis halogenbirli syt öppe 600-700km (auso scho vor Tennant Creek) isch futsch gsy, hani nid auzu viu gseh u wär derby fasch ine fuessgänger putscht, wo im dunkle dr schtrass nache isch gange. Derby cha mer niemer vorwärfe, i heig nid aues gmacht zum es ersatzbirli ufztribe. Z Tennant Creek hani i de angerhaub "veloläde" nachegfragt, u nid emau die beide läde in Alice Springs hei mer i däre hinsicht chönne häuffe. Ersch z Port Augusta, am angere ändi vom kontinänt isch ersatz ufztribe gsy! Weni do dra dänke, machi no hüt ame fasch d schrube.

The Red Centre und üsi kulinarische höheflüg

Zwöi tag schpäter, bi Erldunda, sy mer ufe Lasseter HWY abboge, wo üs zum Ayers Rock / Uluru het gfüehrt. D schtrass het nid e so pflegt wie dr Stuart HWY, wüu si weniger breit isch. Aus entschädigung derfür hei mer ämu bim hifahre –bedingt dür d richtig vor schtrass– meh oder weniger rüggewind gha. 

Sympathischer aus dr highway sy aber die beide roadhouses Mount Ebenezer und Curtin Springs. Das vo Mount Ebenezer ghört ere gmeinschaft vo Yolngu (Aborigines) u ladet mit ere galerie mit kunschtwärch zum chli dört blibe y. Curtin Springs synersyts isch eifach schtimmigsfou und verfüegt über ne schön schpartanische campingplatz: unpowered sites, das heisst plätz ohni schtrom u gas sy gratis; derfür isch dr bode öppe so mit wüeschtebode verglychbar, aber mir sy üs das mittlerwyle ja gwöhnt gsy.

Am tag druf hei mer de Yulara, ds dorf ir nöchi vom Uluru erreicht. Der zäutplatz hie isch zwar grasgrüen gsy, aber leider het das sy priis gha. U dä isch üs z höch gsy. Mir hei dr wüeschtebode vorzoge u sy drum öppe 6-7km bis zur gränze vom nazionaupark zrügg gfahre u hei üs dört nidergloh. Für drü tag isch das eggeli üses deheime gsy, u i ha mi dört sehr wou gfüeut. Ig möcht de o dr kulinarisch teil erwähne, bevor i übere monolith brichte. Mir hei hie d glägeheit gha, härdöpfu u fleisch z choufe (dr supermarkt u d poscht wärte Yulara enorm uf, wüu sech s derby um nützlechi inschtituzione handlet). Brathärdöpfu u gschnätzlets häts eigentlech söue gä. Aber wüu d härdöpfu trotz viu anke nid rächt hei wöue aabrätle u dr huuffe chäs wo mer hei drüber gschosse das ganze ziemli amorph het gschtautet, hei mer eifach mou aues zämegheit – d Yulara-pampe isch gebore gsy (© by Aldi + Wilu). Délicieux! 

Schliesslech mues i no erwähne, dass ds red centre wäge usgiebige vorhärige rägefäu sehr grüen isch gsy, und dass d temperature ou tagsüber nid würklech so sy gsy, dass me sech am liebschte d chleider vom körper hätti grisse – mängisch isch es schlicht arschchaut gsy.

Ayers Rock / Uluru und Olgas / Kata Tjuta

Jetze zum "pflichtteil" vor ouschtraliereis. Am erschte vo de drü ruhetäg sy mer im rahme vonere füehrig im chlybus zu de Olgas / Kata Tjuta und zum Ayers Rock / Uluru gfahre. Zersch hei mer Kata Tjuta bsuecht. Dr Aldi und ig hei üs das ganze mau i rueh aagluegt, do isch o scho dr reiseleiter cho z seckle, wüu mer schüsch nid pünktlech bi sunneungergang bim Uluru wäre gsy. Es het du glych no glängt. Hunderti vo lüt hei sech vo dr sunset area ds farbschpiu vo dr natur aagluegt. Aber sobau ds glüehende rot am erlösche isch gsy u ds farbschpiu im himu isch wytergange, sy die meischte outo scho wäg gsy und ou üsi reisegruppe isch scho schtartklar im büssli ghocket. Es lebe der Massentourismus!

Wo mer üs dr Uluru am nächschte tag mit de velo nomau hei wöue aaluege isch am Aldi sy wächsler usem gwind usgrisse. Pär outoschtop isch mi koleg zum zäut zrügg, nachdäm mer das monumäntale gschtei zäme chli hei aagluegt. Woni am schpäte namittag bim zäut bi aacho het dr Aldi sy wächsler behäufsmässig gflickt gha, aber es isch klar gsy, dass das nid d lösig het chönne sy. Es isch nötig gsy, dass er das teili am nächschte tag inere outowärchschtatt im ächte, "unsubere" und sympathischere teil vo Yulara chli definitiver het lo flicke. Dr mech het ke dräibank zur verfüegig gha u het drum mit syteschnider, sagi u improvisazion e outhäntischi busch-reparatur düregfüehrt. Schlussändlech het dr Aldi zwar dr gröscht u dr chlynscht chranz vo dr cassette nümme chönne bruche, aber ds velo isch wider gfahre u mir hei üsi reis chöne fortsetze.

Kings Canyon / Watarrka

Mir hei ungerwägs beschlosse, dr Kings Canyon / Watarrka z bsueche, wüu er üs uf de poschtchartene so guet het gfaue. Mir sy auso uf d Luritja Road yboge. Woni ha gloubt, e geigneti schteu für üsi mittagspouse gfunge z ha, hani das plätzli mau gneuer beougöpflet u ha mr doch glatt e platte ygfange. Wo dr Aldi isch uftoucht hanim gseit, dass mer zwungnigermasse hie müesse zmittag ässe, wüu i äbe e platte heigi. Är het das zur kenntnis gno, u het mis malheur überbote, indäm er het erklärt, dass sy rahme agrisse syg! I dr tat sy uf beidne sytene vo dr gfäderete hingerbouschträbe uf dr glyche höchi zwöi riss z gseh gsy. Dr Aldi het sys velo über nacht bim ne noche ghöft chönne abschteue. Am nächschte morge isch er mit em Jack, wo ihm scho am vortag het ghouffe richtig Alice Springs gfahre zum die defekti schwinge lo z repariere. I bi elei wyter u ha mit rüggewind (!) d Frontier Lodge erreicht.

Am nächschte tag bini dr Kings Canyon go aaluege. Är isch eifach atemberoubend gsy. D nord- u d südwand sy sehr verschide gsy. Gmeinsam hei si aber gha, dass si beidi sänkrächt bis überhängend ds loch ab sy gange. So hani fasch dr ganz tag i dr nächi vom abgrund verbracht. Schad, het dr Aldi das nid ou chönne gseh. I ha mit ihm chönne pär combox kommuniziere u ha so erfahre, dass är ds Alice Springs isch gsy, dass ds ligevelo scho gflickt sygi u dass är am nächschte tag sötti hie sy. Tatsächlech isch er am nächschte tag aacho u mir hei dr canyon zäme nomau besichtiget. 

Back on the Track

Zrügg ufem Stuart HWY hei mer üsi reis wyter richtig süde fortgsetzt u sy nach eim tag a d gränze zwüschem Northern Territory u South Australia cho. D schtrass isch dört merklich breiter worde, d schtrassepföschte sy angers gsy u dr schtrassegrabe isch jetz us lockerem materiau gsy. Usserdäm isch es jetz ändlech wider chli wermer worde. 

D "U-schtadt" Coober Pedy

När sy mer auso langsam i d nöchi vo Coober Pedy cho. Öppe d häufti vo de bewohner vo dere opausuecher-schtadt läbt i ungerirdische wohnige zum dr brüetende hitz vor summersunne und de froschtige nächt vom wüeschtewinter z entgoh. Mir hei üses zäut aber gäng wie gäng oberirdisch ufgschteut. D schtadt het charakter, si isch gwachse u nid planet, wie öppe Yulara. D trottoirs sy us losem materiau, überau hets schtoub. Ds erschte mau isch üs das im supermarkt so richtig ufgfaue; u es ligt nume zum teil da dra, dass d waar syt jahre im gschteu ufene chöifer het gwartet (mir hei haubpriis-milkaschoggi gchouft, wo scho es jahr überdatum het gha, was mer natürlech z schpät hei gmerkt). Usserdäm het der wind schtändig schtoub vom kahle bode ufgwürblet.

Woomera und Lake Hart

Jetz isch ds längschte schtück ohni verpflegigsmüglechkeit vor üs gsy: 252km sys vo Coober Pedy bis nach Glendambo (30 ywohner, lueg ds fötteli a). Öppe 230km füehre dür d Woomera Prohibited Area. Hie im mönschelääre gebiet het d landschaft öppe so wüeschtemässig usgseh, wieni mir das ha gwünscht. Wyt u breit eifach nüt, nüt, nüt.

E wytere höhepunkt isch dr sauzsee Lake Hart gsy. Mir sy i dr dunkuheit aacho u hei am morge dr see erchennt. Natürlech hei mer üs das us dr nöchi müesse go aaluege. Mir sy öppe e schtung am und ufem see gsy, wo übrigens zum gröschte teil mit wasser bedeckt isch gsy. Dört hei mer ou vier emus gseh, wo ne morgeschpaziergang hei ungernoh.

Schaffe mer s bis PA?

Mir sy no drü tagesreise vo Port Augusta entfernt gsy, wo dr Aldi e defekt a sym vorderredli het bemerkt. Es het sech usegschteut, dass syni fäuge futsch isch gsy. Är het zwar no chönne fahre, het aber müesse luft usem pneu loh, zum nid e fäugeplatzer z riskiere – das het natürlech viu chraft gchoschtet bim fahre. Aber nüt desto trotz: mir heis woubehaute bis uf Port Augusta gschafft u hei so dr kontinänt dürquert gha. Zum glück het dr Aldi z Port Augusta en ersatzfäuge gfunge (was nid eifach isch gsy) u ds erwähnte ersatzbirli für mi schynwärfer.

Port Augusta bis Adelaide: kulturschock

Mit dr akunft in Port Augusta sy mer aber wider i d "fäng" vo dr zivilisation cho u hei üs jetz uf dichtbefahrnige schtrasse bis Adelaide dürekämpft. Es isch nid würklech schön gsy u di rücksichtslosi fahrwys vo de motorisierte verchehrsteilnähmer het i mir mängge wuetaafau usglöst. Dr räge, dr wind u d cheuti hei o no chli nacheghoufe. So sy mer bi täglichem schiff bis Adelaide gfahre. Nach ere chlyne irrfahrt hei mer wyt absyts vom zäntrum e campingplatz gfunge. Hie isch aber nümme die lockeri hautig vom Norde azträffe gsy, viumeh sy schwyzerischi gnauigkeit u pünktlechkeit aagseit gsy. Mir heis nur ungärn zur kenntnis gno. Ds velofahre i so re grosse schtadt isch nid würklech ungfährlech, aber me chunnt rächt guet voraa. Mi hets zum schtrand vo Glenelg zoge; d fäuge vo mim velo wärde mer dä abschtächer äuä nid so schnäu vergässe... 

Mir hei s gschafft: Melbourne!

Trotz es paar widrigkeite sy mer schliesslech gsung u woubehaute z Melbourne aacho, wo mer bi re internet-bekanntschaft vom Aldi hei chönne wohne. D schtadt het mer hönne guet gfaue. Das isch zum teil vilech o da dra gläge, dass mer trotz liechter zytnot am zieu vo üsere reis sy aacho u ds erläbte so langsam hei chönne fasse. Zäme sy mer unger angerem ufe Rialto Tower, wo ds höchschte geböid vor südliche hemisphäre söu sy. Dört hei mer chartene gschribe u hei eifach die gmeinsam erläbte abentüür gnosse. 

U das sy nid weni!