Reisebricht

D wüeschti chunnt

Mit der zyt sy die ydrückliche termitehügle immer chlyner u säutener worde. Ou d böim vor savanne sy weniger hochschtämmig gsy. Wo mer z Renner Springs e typ hei gfrogt, wenn ändlech d wüeschti chämi het er gseit "Dir syt drinn! Hie foot d wüeschti a". Tatsächlech markiert das chlyne kaff (nach ryflechem überlege het üse gschprächspartner erklärt, dä ort heigi euf ywohner) dr meh oder weniger offizieu afang vo dr (haub-)wüeschti. I dr foug isch de vegetazion no nidriger worde, büsch und greser hei gly mau dr ton aagäh u mir hei o wyter gseh, wüu jo keni böim meh d sicht hei ghemmt. Jetz isch o mis zwöite biud vo Ouschtralie dr realität zum opfer gfaue: "Wüeschti" im härze vo Ouschtralie heisst nid würklech ändlosi äbeni, e einsame termitehügu am rand vor schtrass und unändlech viu sand. Es heisst viumeh: Flachi u schteili hügle, keini termitehüüffe - derfür überau dornbüsch. Mir hei derfür dr usdruck "agrochrut" prägt, wüu sech s derby um nes chrut handlet, wo mit sine unändlech viune schpitzige dorne es rächt agressivs erschynigsbiud pflegt; was synersyts jewius üsi agressione het lo z tag träte, we s isch drum gange e dornefreie platz für ds zäut z schaffe.

D problematik wyss-schwarz

Nach chlei über 1100km sy mer i dr nacht z Tennant Creek aacho. Die ortschaft isch üs aus z hingerschteletschte kaff beschribe worde. Mir hei gly begriffe, werum. Bevor me i d schtadt chunnt fahrt me dürne "range", e bärg- oder hüguchetti. När geits abe. Uf de erschte paar meter vor sidlig sy mer vo Aborigines-chinder fründlech grüesst worde. Mir hei zrügg grüesst, u bevor mer s hei gschnaut, hei die cheibe goofe probiert, üs vo hinger z schteinige (isch äch das dr grund, werum me z Ouschtralie uf em velo e heum mues aaha?). Zum glück isch es abe gange, so dass mer besser hei chönne beschlöinige. Usser emne indiräkte träffer im Aldi sis auerwärtischte sy mer unversehrt blibe. Die attacke zügt vo de problem u schpannige zwüsche de wysse u de Aborigines (es git viu usdrück, wie si sech säuber nenne. Im Arnhem Land im norde vo Ouschtralie nenne si sech zum bischpiu "Yolngu". E augemeinere usdruck isch mines wüssens "Koori"), wo die urschprüngliche bewohner u bsitzer vo däm kontinänt sy. Ihri zau isch mit dr eroberig dür d Ängländer schtarch zrügg gange, ihri rächt äbeso. Hützutag frischte si zum ne grosse teil es truurigs dasy am rand vo dr gseuschaft. Si sy fasch immer i gruppene azträffe, hüüffig betrunke; dür das möögge u schtrite si viu. Es isch nid grad es ruhmesblatt für Ouschtralie, dass ire gseuschaft nach weschtlichem modäu e minderheit dermasse usgränzt u a oder jensyts vo dr armuetsgränze mues läbe. Wyteri ydrücklechi züge für ds anenangverbyläbe sy d züün, wo d hüser vo de wysse hei umgäh; usserdäm sy nach em achti oder nüni am abe nume no Aborigines i de schtrasse gsy, die wysse heis sech fasch aui i irne hüser "verschanzt". I möcht no es wyters erläbnis aafüege, wo vor problematik vom rassismus zügt: Wo mer am abe vo üsem ruhetag imne restaurant sy go znacht ässe, isch es dusse zu re schlegerei unger Aborigines cho. Wo eine isch z bode gange het e gascht ds frölein gfrogt, ob er tot sygi. Wo d särvierdüse e verneinendi antwort het gäh, het dr gascht nume gfunge: "schad". Mit däm möchti das leide kapitu abschliesse u eifach no aafüege, dass mer o wytus agnähmeri begägnige mit Yolngu hei gha.

D "tüüfusmärmeli"

Bim erschteue vo dere homepage hätti doch tatsächlech fasch vergässe d Devils Marbles z erwähne. Das wär ächt schad gsy, überzüget nech säuber! Viu chani derzue eigentlech gar ni säge; d Devils Marbles lige eifach syt jahrtuusige da. Ds schöne dra isch, dass me se frei cha go aaluege. Si sy touristisch no nid überloffe, obwou si nume grad e haube kilometer vom Stuart HWY ewäg sy. U dört fahrt jo bekanntlech aus düre, wo vo Alice Springs nach Darwin wott - oder umgekehrt. Mir hei üs rächt viu zyt gno u hei die riesige märmeli eifach uf üs lo würke.

Über d roadhouses

250km südlech vo Tennant Creek ligt Barrow Creek (creek bedütet übrigens bach). A däm namittag hets fiin grägnet gha und es paar kilometer vor Barrow Creek, i dr abedämmerig, isch d luft erfüut gsy mit emne feine duft vo Eukalyptus. Das roadhouse (verpflegigsschteu, ähndlech wie ne pub) isch ds tollschte gsy, wo mer bis denn hei gseh. Es isch scho rächt aut u d wäng sy mit frömdländische note im wärt vo öppe 12'000 ouschtralische dollar (1A$ het denn öppe glych viu wärt gha wie 1CHF) übersäit. Das huus isch eifach schtimmigsvou gsy. Do derfür het ou dr barkeeper gsorget, wo üs es feins gmüestäuer het serviert, u d chundschaft. E tourischt isch sichtlech erfröit gsy, üs wider z gseh; mir hei ne am tag vorhär bi de Devils Marbles atroffe u chli plouderet. D ouschtralier hei aui jaggene mit de farbe vo ihrem footballclub treit u hei mit em schpiu mitgfieberet. Mir hei je zwöi "hot Milos" trunke. Dr Milo (schprich: "Maalo") isch näbem bier so öppis wie ds nazionaugsöff vo de ouschtralier. Är isch am ehnschte mit ere warme schoggi z verglyche, aber mire meinig na chli fetter u haut glych chli eige im gschmack. I dere nacht hei mer üses zäut nid zwüsche agrochrut ufgschteut, sondern zmitzt i meterhöchem, nassem gras.

Velofahrer faue uf

Zwöi tag schpeter bini vo drü journalischte vo dr schwyzer zytig "Le Temps" aghaute u interviewt worde. Si hei im rahme vore wäutreis vo dr zytig ar ouschtralienetappe gschaffet. E churze bricht mit fotti isch när tatsächlech i dr zytig und uf internet erschine (leider hei si es paar sache verdräit, zum bischpiu die sach mit de roadtrains). Die episode söu aadüte, dass ds inträsse vo de lüt a velofahrer ziemli gross isch. Grad d ouschtralier fahre uf ligevelos buechschtäblech ab. Es isch sogar vorcho, dass me im nächschte dorf scho het gwüsst, dass mir chöme, wüu die reisende vo üs hei verzeut. Mir sy ou viu gföttelet oder gfiumet worde, mit meh oder weniger geischtriiche frage dürlöcheret worde u hüffig für veruckt deklariert worde... E wytere "medieuftritt" hei mer i dr "Coober Pedy Times" gha, dr lokauzytig vo Coober Pedy - das isch e bemerkenswärti opausuecher-schtadt, woni no schpeter wirde druf zrügg cho. Usserdäm bini mau vom italiänische fernseh interviewt, gfiumt und us aune winkle gföttelet worde. Ob si ds materiau schliesslech hei chönne bruche isch meh aus nume fraglech, wüu vor luter ufregig hani ke gschide satz chönne usebrösmele. 

I wott mit au däm säge, dass ds inträsse a radreisende in Ouschtralie gwautig cha sy. Lüt, wo en ändlechi reis plane sötte sech das vilech vor ouge haute und uf schponsoresuechi go. Ds inträsse, wo me öich i öier eigeschaft aus velofahrer entgäge bringt, sött doch kes schlächts argumänt sy, oder? 

Alice Springs - im härz vom kontinänt

Mir nächere üs uf üsere reis langsam Alice Springs. Bereits 60km vor dr schtadt chunnts mer vor, aus wäri i de vororte. Zwar isch niene ou nume ei zieguschtei z gseh, aber ds wüsse, nach 1700km wider ine richtigi schtadt z cho, schynt mini wahrnähmig scho chli dürenang z bringe. Aber ds tageszieu wott hert erkämpft sy. Dr wind blast so schtarch, dass er jetz ou am Aldi a chraft u närve zehrt. I ha jetz dr vorteil, dass i mi während zwöiehaub wuche ha chönne dra gwöhne u mi demit ha chönne abfinde. Churz vor dr schtadt passiere mer die höchschti schteu vom Stuart Highway. Leider isch dr markierig nid z entnäh, wie höch das isch. 

I dr schtadt hei mer e ruhetag verbracht, wo jede individuell het gnützt. I ha mer es paar "zivilisazionstouglechi" hose gchouft. Natürlech isch o dusche aagseit gsy. Duschet, chleider gwächslet u gwäsche hei mer i dr regu denn, we mer ire schtadt e ruhetag hei ygleit und ufemne campingplatz hei übernachtet. Mit dr zyt het natürlech aues gschtunke, ds zäut genauso wie die nie gwäschnige tricots. Dr höhepunkt isch erreicht gsy, woni mau drü meter hingerem Aldi bi gfahre u mi sy gschtank glych no fasch het hingere gschträlet. Är isch sinersyts mau i ds zäut cho u het gfragt, ob ds zäut oder i dermasse mieffet ...i gloube, es isch ds zäut gsy.

En agnähme kontrascht zu däm thema isch ds znacht, wo mer im "Casa Nostra", emne tolle italiänische restaurant, hei gässe, bevor mer d schtadt im dunkle hei verloh. Wüu mis halogenbirli syt schetzigswys 600-700km (auso scho vor Tennant Creek) zursou isch gsy, hani nid auzu viu gseh u wär fasch ine fuessgänger gfahre, wo im dunkle dr schtrass nache isch gloffe. Derby cha mer würklech niemer vorwärfe, i heigi nid aues ungernoh, zum ersatz z bsorge. Z Tennant Creek hani i de angerhaub "veloläde" nachegfragt; nid emau die beide läde z Alice Springs hei i däre hinsicht öppis z biete gha.

Ersch z Port Augusta, am angeren ändi vom kontinänt isch ersatz ufztribe gsy! No hüt machi ame fasch d schrube, weni a das dänke.

Dingos, the red centre und üsi kulinarische höheflüg

Am nächschte tag hei mer rüggewind gha!!! I gloube, das isch z erschte mau gsy. Ou schüsch isch es e bsungrige tag gsy: Woni am morge bimene raschtplatz ar schtrass fridlech am dehne bi gsy hani gmerkt, dass keni 7 meter vor mir zwöi dingos über d schtrass sy trottet u i de ghüderchüble nach ässbarem hei gsuecht. Wie scho erwähnt: I ha ziemli schiss vor hüng. Auerdings hani do gmerkt, dass mini gägeschpiler no meh angscht vor mir hei gha. I has trotzdäm vorzoge, so schnäu wie müglech abzdampfe. Do derby hani zwöi wyteri vierbeiner gseh, wo äbefaus uf dr suechi nachemne zmorge sy gsy. I bi eifach froh gsy, dass nüt isch passiert. Ds ganze het mi aber glych irgendwie ufgwüeut, wüu langi zyt hani när nid gmerkt, dass i uf dr fautsche schtrassesyte bi gfahre; ersch wo gägeverchehr isch uftoucht, hanis langsam gschnaut...

Bi Erldunda sy mer ufe Lasseter HWY yboge, wo üs zum Uluru / Ayers Rock het söue füehre. D schtrass het üs beidne nid so guet gfaue, wüu si weniger breit (ou in bezug ufe schtrassegrabe) u glychzytig schtercher befahre isch gsy aus dr Stuart HWY. Aus entschädigung derfür hei mer bim hifahre bedingt dür d richtig vor schtrass einigermasse rüggewind gha. Am erschte abe hei mer üses lager z Mount Ebenezer ufgschlage. Das isch es roadhouse, wo are Yolngu-gmeinschaft ghört. Am nächschte morge sy mer yne, wüu mer üses zäut hei müesse lo uftoue u tröchne. Es het ir nacht effektiv gfore gha (e maa het mr in Alice Springs verzeut, dass das dr cheutischt winter syt langem syg; es syg 8°C ungerem durchschnitt). Mir sy auso es tee go trinke, nachdäm üs dr chef het yglade. Ds roadhouse het e schöni galerie mit biuder u gägeschtänd, wo vo Aborigines sy gschaffe worde. D musig, wo isch gloffe, het üs beidne grad sofort gfaue. Si gfaut mer je lenger je besser - i ha mer d CD (Birrkuta - Wild Honey) schpeter in Melbourne gchouft. D gruppe heisst Yothu Yindi, das bedütet übrigens "ching u mueter". Am nächschte abe hei mer in Curtin Springs haut gmacht. Das isch näbe Barrow Creek ds zwöite sehr bemerkenswärte roadhouse. Do hanget zwar kes gäut a dr wang, derfür isch e "original Curtin Springs bullshit" a d wang gnaglet. U d lüt sy ou hie eifach zfride. Es het üs zwar chli überredigskunscht gchoschtet, aber schliesslech het dr choch am schpäte abe no bacon and eggs gchocht, ds typisch ouschtralische zmorge. Ou dohie sy mer d attrakzion gsy, wo e horde tourischte usemne bus isch gschtige. Am abe hei mer ufem campingplatz zäutlet. Unpowered sites, auso plätz ohni schtrom u gas sy gratis; derfür isch der bode öppe em wüeschtebode äbebürtig. Aber mir sy s üs jo mittlerwyle gwöhnt gsy.

Am nächschte tag sy mer z Yulara, das isch ds dorf ir nöchi vom Uluru, aacho. Dr zäutplatz dohie isch grasgrüen gsy, aber die guete lüt hei 11A$ pro pärson verlangt. Das isch eifach chli z viu gsy, we me no bedänkt, dass üs das "dorf" (resort) überhoupt nid het gfaue. Es isch totau uf tourismus usgrichtet, absolut clean, so richtig schteriu. Drum hei mer beschlosse, dass mer usserhaub vom nazionaupark wiud sy go campiere; im nazionaupark drin isch es verbote, so dass mer 6-7km hei müesse zrügg fahre zum nes gäbigs plätzli z finge. Mir hei hie und i dr umgäbig fasch drü ruhetäg verbrocht, so dass i mi fasch e chli deheime ha gfüeut. I möcht denn o dr kulinarisch teil erwähne, bevor i übere monolith brichte. Mir hei hie d glägeheit gha, härdöpfu und fleisch z chouffe (dr supermarkt u d poscht wärte Yulara enorm uf, wüu sech s derby um nützlechi inschtituzione handlet). Brathärdöpfu mit gschnätzletem hätts eigentlech söue gä. Aber wüu d häppere trotz viu anke nid rächt hei wöue aabrate u dr huuffe chäs, wo mer hei drüber gä, das ganze ziemli amorph het gschtautet, hei mer eifach aues zämegheit - d Yulara-pampe isch gebore gsy (© by Aldi + Wilu). Ou am nächschte tag hei mer üs dä goumeschmuus nid lo entgo u hei ne no mit tomate, chnoblech u zibele ergänzt. Délicieux!

Ayers Rock / Uluru und Olgas / Kata Tjuta

Jetze zum "pflichtteil" vo üsere reis. Dr ytritt i eigentlech nazionaupark het 15A$ gchoschtet u isch für 5 tag güutig gsy. Mir sy am erschte ruhetag im rahme vonere füehrig im chlybus zu den Olgas / Kata Tjuta und Ayers Rock / Uluru gfahre. Das isch usser de öffentliche verchehrsmittu z Melbourne ds einzige mau gsy, woni nid mit em velo bi ungerwägs gsy. Zersch hei mer Kata Tjuta bsuecht. Dr Aldi und i hei üs das ganze mau i rueh wöue aaluege, da isch o scho dr reiseleiter cho z seckle, wüu mer schüsch nid pünktlech bim sunneungergang bim Uluru wäre gsy. Es het du glych no glängt. Hunderti vo lüt hei sech vo dr sunset area ds farbschpiu vor natur aagluegt. Aber wo ds schpiu no isch wyter gange, u dr hügu zwar nümm so rot, derfür dr himu umso meh blau-rosa isch gsy, hani gmerkt, dass die meischte outo scho wäg sy gsy. Und ou üsi reisegruppe isch scho schön parat im büssli ghöcklet. Dr Aldi het zersch weni verschtändnis gha, woni ihm ha gseit, mir sötte langsam go; aber woner die angere het gseh, het er mis plötzliche pressiere verschtange. Wo mer när vo Yulara -mir hei üsi velo dr tag über dört abgschteut gha- zum zäut sy zrügg gfahre, hei mer gmerkt, dass es gar nid so eifach isch, im dunkle es  verschteckts zäut wider z finge... Aber gedoud isch jo schliesslech e tugend. 

Am nächschte tag hei mer üs dr Uluru pär velo aagluegt. Für das hei mer scho am haubi füfi müesse ufschtoh, was üs würklech nid liecht isch gfaue. Aber mir heis grad gschafft, bis zum sunneufgang die knapp 30km zwüsche üsem zäut und em Uluru hinger üs z bringe. Mir hei dr hoger pär velo wöue umrunde (das sy öppe 10km), aber es isch zersch mau angers cho. Am Aldi sy wächsler isch usem gwind usgrisse u i de schpeiche glandet. Pär outoschtopp isch är (auso dr Aldi) zum zäut zrügg, nachdäm mer ds monumäntale gschtei zäme chli hei aagluegt. Es herrscht übrigens e kontroverse, ob d Yolngu aus bsitzer vom Uluru (si hei ne dr regierig "vermietet") ds beschtige verbiete, oder ob si s eifach nid so gärn heige, wüu si sech für aufäuigi zwüschefäu mit tote oder verletzte verantwortlech füehle. Mir hei beschlosse, üsi füess nid ufe monolith z setze, obwou üs das würklech hönne schwär isch gfaue - d ussicht vo dört obe söu sehr schön sy. Me cha Kata Tjuta uf dr einte und dr Mount Conner uf dr angere syte gseh, die drü erhebige schtöh ziemli gnau ire linie. Nachdäm sech dr Aldi het verabschidet gha, hani dr Uluru zersch mau pär velo u när no z fuess ufem wanderwäg umrundet. Viu schteue sy sogenannti sacred sites, heiligi schtättene, wo nume gweihti Koori-männer oder -froue dörffe beträte. Ds föttele vo söttigne schteue isch verbote. Schad, wüu hüüffig sy grad das die schönschte eggene gsy. Us dr nöchi wird klar, dass dr Ayers Rock viu meh het z biete u viu abwächsligsriicher isch, aus uf de berüehmte sunneungergangsfottine. Es git wie bi Kata Tjuta schteuene, wo sech d pflanze ihre wohnruum hei eroberet. Dr feuse isch lang nid so homogen, wie me das würd erwarte, sondern mit löcher, schpäut u angerne forme sehr abwächsligsriich. Bim umelouffe wär i übrigens fasch ufene schlange tschaupet, hie dr bewiis. Woni bim zäut bi aacho, het dr Aldi sy wächsler behäufsmässig gflickt gha, aber es isch klar gsy, dass das nid d lösig het chönne sy. I ha no mi sänf derzue gä, aber ou so isch es nötig gsy, dass mer am fougende tag das teili ire outowärchschtatt im ächte, "unsubere" u sympathische teil vo Yulara e chli definitiver hei lo repariere. Dr mech het ke dräibank zur verfüegig gha u so het er mit sagi, syteschnider und improvisazion en outhäntischi busch-reparatur düregfüehrt. Schliesslech het dr Aldi zwar dr chlynscht u dr gröscht chranz vor cassette nid chönne bruche, aber ds velo isch wider gfahre u mir hei chönne ufbräche.

Kings Canyon / Watarrka

Mir hei schpontan beschlosse, dr Kings Canyon / Watarrka z bsueche, wüu er üs uf de poschtchartene so guet het gfaue. Für das hei mer dr umwäg vo zwöi mou 150km in chouf gno. Uf em wäg dörthäre sy mer wider z Curtin Springs verby cho, wo mer zuefäuigerwys e hering wider hei gfunge, wo mer bim erschte bsuech hei verlore! Am nächschte tag sy mer nach 20km fahrt uf d Luritja Road abboge, wo zum Kings Canyon füehrt. Syt däm tag bin ig wider vorne gsy (mir sy jo gschtafflet gfahre) u so isch es a mir gläge, e platz zum choche z sueche. Woni ha gmeint, i heigi öppis passabus gfunge, hani mer das eggeli mau chli gnöier aagluegt. Do derby hani das unagnähme pfyffe ghört, wo jedem velofahrer vertrout isch. Wo dr Aldi isch uftoucht hanim gseit, dass mer zwungnigermasse do müesse zmittag ässe, wüu i äbe e platte heigi. Är het das zur kenntnis gno u het mis malheur überbote, indäm er het erklärt, sy rahme sygi aagrisse! Tatsächlech sy uf beidne syte vo dr gfäderete hingerbouschträbe uf glycher höchi zwöi risse z gseh gsy. Mir hei scho bi dr reparatur vom wächsler in Yulara gmerkt, dass sech do öppis tuet, wüu dr lack isch abbletteret u me het gseh, dass sech ds alu liecht het verformet gha. Aber mir hei dänkt, das hebi no lang... Jetz isch guete rat tüür gsy. Mir hei d nahrigsvorrät, chochzüg, apothek, resärvepneu, wärchzüg u glüehbirli uf mis velo umglade (leider hei mer vergässe d sunnecrème umzlade; mini ohre sy vor luter fröid ganz rot worde). Dr Aldi isch es schtückli zrügg gfahre u het sis velo bimne ghöft i dr nöchi chönne lo schtoh. Mir hei abgmacht, dass mer üs bi dr einzige chrüzig vo däre schtrass träffe zum üses zäut ufzschteue. So bini när eleini wytergfahre über zaulosi schteili u weniger schteili hügeli, immer am liechtchegu vom schynwärfer nache. D schtrass isch jetz praktisch verchehrsfrei gsy, u die drü outo, wo mer im dunkle sy begägnet, sy mer aui entgäge cho - päch für e Aldi. A dr abgmachte chrüzig hani e schteu gsuecht, für ds zäut ufzschteue u ha mi druf ygschteut, dass es lenger chönnt duure, bis mi koleg chunnt. Zum glück isch es angers gange: Wüu s fasch ke verchehr het gha, het dr Aldi ou die entgägekommende fahrzüg gschtoppet, i dr hoffnig, dass sech öpper sire erbarmi. Bim dritte versuech het er glück gha u dr Jack isch äxtra die 40km zrügg gfahre zum mi fründ vore nacht im freie z bewahre! So isch Ouschtralie.

Am nächschte morge het dr Aldi nid rächt gwüsst, was er söu mache, und aues woner am tag vorhär het verzeut, het kei güutigkeit me gha. Das het mi ziemli schtinkig gmacht. Derfür hei mi dr rüggewind, die schöni landschaft u dr rekordverdächtig schnitt vo 20km/h entschädiget. Zu mire rächte het mi die über 40 meile längi George Gill Range begleitet, wo mi schtarch a Jura het erinneret. So bini guet gluunet bi dr Frontier Lodge aacho. Hie hani füre campingplatz ychecket. D nacht choschtet ou hie 11A$ pro pärson, aber d gränze vom nazionaupark isch das mou mit 40km eidütig z wyt wäg gsy. Und usserdäm het mi dr Aldi jo ou müesse chönne finge, wenn er de isch zrügg cho. 

I ha scho gly mit em campingplatzeigene dingo bekanntschaft gmacht. Aus, wo frei isch umegläge isch verchätschet worde, aber ou d zäutschnuer het er mau müesse uf ihri riissfeschtigkeit hi prüeffe; si het leider nid verhebt. Äbefaus öppis sehr intressants isch dr zäutsack gsy, woner het gedänkt mitznäh. I bi i de socke hingernache gsecklet und nachere rhetorische meischterleischtig hanim das züg wider chönne abluchse. Schpeter het er sech du no für d brönnschtofffläsche vo üsem chocher entschide, aber die isch du glych nid so guet gsy. Jetz hani eifach aues, ussert em velo i ds zäut gmoschtet. Wüu i alei bi gsy isch das jo no gange, aber wie söu das usgseh, we de dr Aldi no chunnt?

Am tag druf bini die 10km zum Canyon gfahre u ha die 6.5km längi wanderig in agriff gno (das isch de für mi en enormi leischtig, wüu i e fahrbare ungersatz am louffe bi wytem vorzieh!). Dr canyon isch atemberoubend gsy. Är isch viu weniger läng, derfür breiter gsy, aus i ne ha erwartet. D nord- u d südwand sy sehr verschide gsy. Gmeinsam hei si gha, dass si beidi sänkrächt bis überhängend z loch ab sy gange u so glatt sy gsy, dass me hätt chönne meine, öpper heigi eifach e bitz feuse usegsaget. So hani du fasch dr ganz tag ir nächi vom abgrund verbracht. Würklech schad het dr Aldi das nid o chönne gseh. I ha mit ihm pär combox chönne kommuniziere u ha so erfahre, dass är in Alice Springs isch, ds velo scho gflickt u dass är am nächschte tag hie sötti aacho. E chlyni unsicherheit isch blibe, wüu mer beidi ds gnaue datum nume säute hei kennt; i ha ke uhr mitgnoh u ha drum meischtens nid emau d tageszyt kennt.

Tatsächlech hani ne am nächschte tag troffe. D schwinge isch repariert gsy und ou d schrube vom wächsler isch dür nes originauteili ersetzt worde. Zäme hei mer die haarschtröibendi kulisse beougöpflet u dr Aldi het no dr lookout-path entdeckt, woni am vordere tag vergäbens ha gsuecht. Ohni irgend en abschrankig hei mer bis a üsserscht rand vo der überhängende wand chönne vordringe. Natürlech hei mer das ufem buuch ligend gmacht, u no so hei mer hönne schiss gha; aber es isch e heideschpass gsy. Am abe sy mer no i d bar vo dr Frontier Lodge gange. Dört isch so richtig schtimmig ufcho, wo sech dr musiker bimne schtromusfau ohni verschtercher het i ds züg gleit.

Back on the Track

Dr abschid vo däm fläckli ärde isch mer när richtig schwär gfaue. Aber dr abschid vo Watarrka het o ds widerluege mit emne aute bekannte bedütet: dr gägewind het sech i auer heftigkeit wider zrugg gmäudet. Nach drü tag fahrt sy mer wider ufe Stuart HWY (hüüffig eifach dr "track" gnennt) cho, wo so öppis wie üses deheime isch gsy. Dr "abschtächer" i ds red centre (wo wäge de rägefäu im herbscht sim name gar nid isch gerächt worde u für üse gschmack viu z grüen isch gsy) het öppe zwöi wuche u 1000km duuret. 

Churz nach Kulgera, emne roadhouse, sy mer a d gränze zwüschem Northern Territory und South Australia cho. D schtrass isch merklich breiter worde, d schtrassepföschtli sy massiver worde u dr schtrassegrabe isch us lockerem materiau gsy, so dass me ds velo nid guet het chönne schtüüre, we me mau drin isch glandet. Dir fraget nech jetz vilech, was mir im schtrassegrabe hei gmacht. Mir hei ne jewile aus uswiichschteu brucht, we sech i üsere nöchi e roadtrain und es angers fahrzüg hei gchrüzt. D roadtrains sy mit öppe 50m lengi die gröschte "normale" fahrzüg uf de schtrasse vo dere wäut. Si sy scho e ydrücklechi erschinig mit bis zu vier anhänge. I dr regu hei mer keni problem gha, usser äbe we si mit angerne fahrzüg hei gchrüzt, überhout sy worde, oder -u das isch auso d herti gsy- säuber hei überhout. D überhoumanöver hei sech mit emne röhrende motoregrüsch aakündiget u hei sech über hunderti vo meter hinwäg zoge (zum sone camion z überhole sött me e schtrecki vo öppe emene kilometer yberächne). I söttigne situazione isch e rückschpiegu goud wärt gsy.

Churz vor dr nächschte bedütende schtazion, Coober Pedy, hei mer dr Dingo Fence passiert. Dä zuun isch hüt öppe 5000km läng u het früecher mau ds dopplete gmässe. Är söu hüt derzue diene, d dingos im norde vo de schafherde im süde fernzhaute. Urschprünglech isch er 1887 erschteut worde zum dr norde vor de tablarchüe (zuegäh, das isch jetz äxtra chly urchig gsy. Normalerwys sägi däne tierli o chüngle) z schütze. Aber bis er isch fertiggschteut worde, hei sech die härzige viechli scho glychmässig uf beide sytene vom zuun verteilt gha. Ou hüt loht sech mire meinig na über d würksamkeit vom zuun lo schtrite: Ds erschte übercharete tier, wo mer änet em zuun hei gseh, isch e dingo gsy.

D "U-schtadt" Coober Pedy

När sy mer auso langsam uf Coober Pedy cho. Dr name vo dere schtadt isch us dr schprach vo de Yolngu abgleitet. "Kupa piti" bedütet "wysse ma im loch". Das dütet scho ufe houptykommenszweig vo däre ortschaft zmitzt im nüt hi: hie wird grabet wie blöd. D lüt sy uf dr suechi nach opale, dene wunderschöne eduschteine, wo i verschidene farbe funkle. Überau hets schiuder wo vor de gfahre dür d schächt warne. Mir hei üses zäut ohni s z wüsse es paar hundert meter vor em erschte söttige schiud ufgschteut... Coober Pedy deklariert sech säuber aus opauhouptschtadt vor wäut. Viu lüt (es söu d heufti vo dr bevöukerig sy) läbe i ungerirdische behusige, drum mini bezeichnig aus "U-schtadt". Die ungerirdische wohnige sy grabet worde, zum ar brüetende hitz vor summersunne und de froschtige nächt vom wüeschtewinter z entcho. Mir hei üses lager aber wie gäng oberirdisch ufgschlage. 

D schtadt het charakter, si isch gwachse u nid planet, wie öppe Yulara. D trottoirs sy us losem materiau u überau hets schtoub. Z erschte mou isch üs das im supermarkt so richtig ufgfaue und es isch nume zum teil da dran gläge, dass d ware syt jahre im gschteu ufene chöiffer hei gwartet (mir hei haupriis-milkaschoggi gchouft, wo scho es jahr überdatum het gha, was mer natürlech chli z schpät hei gmerkt). Dr einzig minuspunkt, wo die schtadt us mire perschpektive het, sy die vile hüng, wo äuä die gfungnige schteine tüe bewache. Bis do hi hei mer i de ouschtralische schtedt u dörfer chuum einisch hüng gsichtet gha. Wo mer d schtadt nach zwöi ruhetäg ume hei verloh het dr wind ändlech d richtig gwächslet u het jetze vo dr syte u mängisch vo hinger gfägt. Do sy sogar pflanze uf wanderschaft gange.

Woomera u d wassertanks

Jetz isch ds längschte schtück ohni verpflegigsmüglechkeit vor üs gsy: 252km sy s vo Coober Pedy bis nach Glendambo (30 ywohner, lueg ufem fötteli). Öppe 230km füehre dür d Woomera Prohibited Area. Das riesige gebiet het früecher aus raketeteschtgländ dienet. Ou atombombene sy hie zündet worde. D schtadt Woomera, wo am südöschtliche egge vo dr prohibited area ligt, isch nume für d arbeiter vom militär bout worde. Ds wasser schtammt usere 180km länge pipeline, wo vo Port Augusta här isch zoge worde. Die "beschte" zyte vor schtadt lige aber scho einigi jahr zrügg. Hüt wird i d schtärne glueget, sowyt d fluetliechter vom flüchtlingslager näbedra das zuelöh... 

Hie im mönschelääre gebiet het d landschaft öppe so wüeschtemässig usgseh, wieni mir das gwünscht ha. Entlang vom Stuart HWY sy i unregumässige abschtänd (je nach bedarf) wassertanks ufgschteut, wo me sech mit einigermasse früschem wasser cha versorge. I üsem schtrassenatlas sy die im augemeine meh oder weniger zueverlässig verzeichnet gsy. Dr erscht und für üs wichtig wassertank, wo im gebiet vom Woomera isch yzeichnet gsy, isch in würklechkeit aber nid vorhande gsy. Mir hei üs scho mit dr vorschteuig vertrout gmacht, dass mer de vomne fründliche outomobilischt chli wasser müesse go erbitte. Do hei mer dr tank doch no gfunge u hei usequetscht, was isch z hole gsy; 10km schpeter aus planet. I bi es zwöits mou chli i wassernot grate: Prinzipieu hani bi jedem tank überprüeft, ob er dört isch, woner sött sy, u ob er intakt isch. We dr tank het gfäut oder zum bischpiu dr wasserhane kaputt isch gsy, hani mer das notiert; es hätt jo vilech emne angere veloreisende chönne häuffe. Das hani natürlech o im Woomera gmacht, do hets mi bsungers wichtig dünkt. Dummerwys hani do derby einisch vergässe, mini fläschene z füue... 

E wytere höhepunkt isch dr sauzsee Lake Hart gsy. Mir sy im dunkle aacho u hei am morge dr see erchennt. Natürlech hei mer üs das ganze mau us dr nöchi müesse go aaluege. Mir hei öppe ne schtung am und ufem see verbracht, wo übrigens zum gröschte teil mit wasser isch bedeckt gsy. Dört hei mer o vier emus chönne beobachte, wo es morgeschpaziergängli hei ungernoh.

Schaffe mers bis PA?

Mir sy no drü tagesreise vo Port Augusta ewäg gsy, wo dr Aldi e defekt a sim vorderredli het feschtgschteut. Es het sech zeigt, dass es nid eifach es achti isch gsy, sondern dass d fäugewand z dünn isch worde u drum e delle het gha. Do het nume luft abloh ghouffe. Jetz het er wider chönne fahre, aber es het dr Aldi natürlech meh chraft gchoschtet aus vorhär. Sis zieu isch es jetz gsy, sis ligevelo heil bis uf Port Augusta z bringe. Schmärzlech isch für ihn o gsy, dass grad jetz die zwöi bishär mit abschtand längschte u schteilschte abfahrte sy z bewäutige gsy. Är het sini gschwindigket uf 25km/h limitiert, währenddäm i mit über 60km/h ha chönne z loch ab frese. Es wyters hindernis hei d grids dargschteut. Das sy meischtens ysebahnschine gsy, wo quer zur schtrass sy gläge u für ds vieh e unüberwindbari barriere hei dargschteut. I dr Weschtschwyz sy si aus Bovi-stop bekant. Derby hei mer feschtgschteut: je schnäuer me drüber fahrt, desto weniger houperts. Mit dr kaputte fäuge het sech dr Aldi das aber nid chönne leischte u het jewyle müesse abschtige. Nüt desto trotz: mir heis woubehaute bis nach Port Augusta gschafft u hei do dermit dr kontinänt dürquert gha. Glücklicherwys het dr Aldi in Port Augusta en ersatzfäuge gfunge (was nid liecht isch gsy) u die erwähnti ersatzbire für mi schynwärfer. D schtadt het es chlyses läbhafts zäntrum. Es isch schwär, d ambiance z beschribe, aber mir hei üs ämu wou gfüeut. Z einzige manko us mire sicht: es het nume seafood u asiatischi restaurants, die italiänischi chuchi isch leider nid verträte.

Port Augusta bis Adelaide: kulturschock

Auerdings hei mer so öppis wiene kulturschock erlitte. We mer jetz angerhaub mönet meh oder weniger i dr zivilisazionsarme einsamkeit vo dr wüeschti sy gsy, wo mer hei chönne tue und mache, was mer hei wöue, wo nume agrochrut u vereinzelti böim sy gwachse, wo s chuum verchehr het gha, so hei mer üs jetz zwüsche Port Augusta und Adelaide i zuesehends dichter besidletem, fruchtbarem gebiet mit viu verchehr befunde. Es isch nid würklech schön gsy u die rücksichtslosi fahrwys vo de motorisierte verchehrsteilnähmer het i mir so mänge wuetaafau usglöst. Dr räge, dr wind u d cheuti hei o no ire sänf derzue gäh. Ab und zue isch aber dr gaugehumor schtercher gsy, und i ha däm ganze e humorvoui syte chönne abgwinne, so zum bischpiu wo mer bi räge, wind u cheuti das prächtige zmittag hei gchochet. 

So sy mer bi täglichem räge bis Adelaide gfahre. Nach ere chlyne irrfahrt hei mer wyt absyts vom zäntrum e campingplatz gfunge. Hie isch aber nümme die lockeri hautig vom norde aazträffe gsy, viumeh sy schwyzerischi genauigkeit u pünktlechkeit aagseit gsy (für was geit me de eigentlech no i d ferie? ;-) ). Na ja. Mir hei d schtadt am erschte ruhetag zäme uskundschaftet. Am zwöite tag sy mer jede uf eigeti fuuscht uf entdeckigsreis gange. Ds velofahre i sore grosse schtadt isch nid ganz ungfährlech aber me chunnt rächt guet vorwärts. Mi hets zum schtrand vo Glenelg glockt, d fäuge vo mim velo wärde mer dä chly abschtächer äuä nid so schnäu vergässe...

Hinger Adelaide hei üs schteili hügle erwartet. D roadtrains, wo syt Port Augusta nume no zwöi, i usnahmefäu drü aahänger hei gha, hei sech schwär schnuufend dr bärg ufe gschobe; angeri sy mit knapp 20km/h abe gfahre. Das het e guete ydruck vo de enorme laschte, wo si desume schleppe vermittlet.

När het üs d schtrass entlang vom Coorong National Park gfüehrt. Hie isch ds grüsch vo unzählige quakende frösch z ghöre gsy. Woni s zerschte mou ha ghört u no nid ha chönne idäntifiziere, hani angscht gha, irgend öppis am velo sygi zur sou.

Nach Kingston isch mer ds väntiu vom schluuch usgrisse, woni wäge luftverluscht ha wöue pumpe. Es isch scho dunku gsy, aber d reparatur isch vereifacht worde, indäm e hiufsbereite outomobilischt het aaghaute und mer mit sine schynwärfer het liecht gmacht. Är isch übrigens säuber bsitzer vomne ligevelo und het sech s nid lo näh, e rundi ufem reparierte velo z dräie. Wo mer sy wyter gfahre hets immer schtercher afo rägne. Aber es isch sehr schwirig gsy, e geignete platz für ds zäut z finge, wüu linggs u rächts vor schtrass sumpf isch gsy. Schliesslech hei mer öppis passabus gfunge u hei mit voudampf üses bütlete zäut ufgschteut. Dusse hets gschtürmt u prieschet vom schtrübschte. Am morge isch es drum o nid erschtuundlech gsy, dass mini sacochene, woni über nacht immer ha i ds zäut gno, ire glungge sy gschtange.

Mir heis gschafft: Melbourne!

Trotz au de grosse u chlyne widrigkeite (mir isch zum bischpiu churz nach Adelaide mis porte-monnaie abhande cho. Wonis uf dr polizeischtazion ha abghout, hei zwar 50-60A$ bargäut gfäut, aber visacharte, pass etc. sy no dört gsy. Dr Aldi het 3 tag vor Melbourne feschtgschteut, dass o d hingerradfäuge am arsch isch gsy), wo üs im südliche gebiet sy widerfahre, hei mers bis Melbourne gschafft. Vom ygang zur schtadt bis zu üsere ungerkunft bi re internet-bekanntschaft vom Aldi sys 85km gsy. Mir hei ziemli zieusicher die richtige schtrasse dür ds zäntrum vor schtadt gfunge. Schliesslech hei mer nume no müesse ufem richtige HWY fahre. Aber dä hets in sech gha. Ei hügu het sech a nöchscht greiet. Ziemli usglougt sy mer när z Belgrave aacho. Mir hei jetz zwöi tag hingerenang 145km zrügg gleit - urschprünglech hei mer die schtrecki i drü tage wöue bewäutige. Aber när hei mers wöue wüsse. U es het sech uf jede fau glohnt.

Melbourne het mer besser gfaue aus Adelaide, wo üs vo einige ouschtralier aus sehr schöni schtadt isch empfohle worde. I weis nid was derfür isch usschlaggäbend gsy; vilech löh nech d impressione, woni ha uf photopapier bannet, mi gfaue a däre schtadt begryffe. Entscheidend isch sicher ou gsy, dass mer trotz liechter zytnot am zieu vo üsere reis sy gsy. Zäme hei mer dr Rialto Tower besichtiget. Dä söu ds höchschte huus uf dr südliche hemisphäre sy. Dört hei mer chartene gschribe u eifach die gmeinsam erläbte abentüür gnosse. U das sy nid weni gsy!